今期目錄
共6頁
封面 : (第一頁為空白，請拖下至第2頁開始閱讀封面)
第2-3頁:
第4-5頁:
第6頁:
文：阿嘉花
新學年已開始，有領取書簿津貼的家長們，有沒有發現津貼跟往年略有不同？其實，一群基層家長和學童一直爭取改革學生資助制度，學童所得資助，早已不止於買書買簿。
甚麼是上網費資助？
由去年開始，全額書津及綜援家長，多了一筆1300元的上網費資助，半津就獲一半，即650元，以支援日益普及的網上學習模式。基層家長更可以優惠價購買電腦（連免費保養）加月費計劃，亦可零散式購置配件。詳情見此–> http://www.weborganic.hk/ （有機上網）或 http://www.go2event.com/home.asp （上網樂與腦）（兩個計劃分別在於居住地區的不同）
學生資助包括甚麼？
有書簿津貼、車船津貼，近年加添了上網費津貼。有民間團體正爭取將課外活動納入學生資助範圍，你又支持嗎？越來越多學校提倡一生一體藝，「課外活動」已不再「課外」，收費回條到家長手上，已不是錦上添花，而是基本學習支出需要了。
書簿津貼不只是書和簿？
書簿津貼，從來就不只資助書和簿，而是由課本項目津貼（書簿費）和定額津貼（開學雜費）組成。今年起定額津貼調升，全津由408元增至1000元，半津由204元增至500元。因此大家會發現今年津貼額多了。
全津半津怎樣審批出來？
審批資格從來都是各大民生政策的核心爭取目標，關乎基層學童的學生資助政策，亦不例外，現在，四人家庭，終於不用窮到入息在八千幾蚊以下，才獲全額津助，詳情見附表。
最後，社會環境不改變，家庭環境亦難改善，子女的未來其實就在我們手上，大家要多留意社會政策，多站出來爭取呀！
|
家庭人數 |
全額書津月入上限 |
半額書津月入上限 |
|
3 |
由7177元 至12000元 |
19167元 |
|
4 |
由8971元 至13800元 |
23959元 |
|
5 |
由10766元至14869元 |
28751元 |
|
6 |
由12560元至17347元 |
33542元 |
講股？講古？講金！
文：小焦博士
每日的早餐及午餐後的股票開市時間，不知曾幾何時，電視台由重播節目，變成了財經節目。電視主持，會邀請不同的財經界人士上來，分析當日大市走勢，解答家庭觀眾查詢的股票問題。筆者睇完之後，卻為筆者帶來滿腦子疑惑。
金融才俊是被邀出席還是排隊上鏡？
負責分析的股評人（或「財演」，財經演員是也），來來去去都是某某證券行的董事、某投資公司的證券部經理、銀行分析員等，每朝放個人出去做半個鐘節目，分析下經濟，好過出錢賣廣告。港股單單是今年8月份成交金額已經有$1,812,010,000,000（一萬八千億），根據港交所2009/10年的研究指出（註一、二），約有26%的成交額來自散戶（Retail investor），即使我們不計算投資衍生工具較高的手續費或行政費用，以0.15%至0.3%的股票交易手續費計算，證券行、銀行單是代客買賣證券就無風無險穩賺七至十四億。教識你炒股，等你多買多賣，負責收錢的當然無任歡迎。亞視節目「理財博客」收錢「訪問」上市公司主席，結果被亞視新聞及公共事務部前高級副總裁梁家榮踢爆，媒體與財經鉅子在大家背後的合作與運作，又有多少人知情？
分析方法？
不過，單是技術分析的工具，種類就包括趨勢線、線形形態、技術指標、陰陽燭、成交量與價格比較，還可以活用不同分析方法互相配合。但每日所見股評人所用的分析方法，不外是簡單的移動平均線、陰陽燭等，到底是他／她們所用的工具威力最大、無往而不利，還是未經深思熟慮，隨手用上記得的分析方法，作出直覺回應？上市公司的資訊，例如市盈率、折讓率、同業比較等，其實只要在證券公司開立戶口或付上月費，即可一覽無遺。而且，每天接觸這麼多的訊息，又美國就業不足率、歐元區通漲率……你接收完，又是否過濾得完？
可能你會當股評人是「神燈」，不過都有人當他們是「明燈」，一位股民就在有線電視的財經節目大鬧股評人「我發覺你成日為咗啲衍生工具，而誤導散戶買賣股票，你唔怕有報應架咩」，影片在網上已有超過十萬次點擊。無窮無盡的衍生工具、投資工具，令市場波幅更大更不穩定，當年雷曼兄弟爆煲，全世界雞毛鴨血。去賭場玩，賭到盡都係輸埋自己條命，炒股炒輪買期貨，一班銀行大班基金經理，自己玩就要全世界陪葬。
最近美國就有二千幾人佔領金融中心華爾街，目標是紮營露宿一個月，他們來自全國各地，有不同階層，同樣行動正在不同州份的金融中心出現，例如波士頓、芝加哥等，連日來遭到當地警方暴力驅散，近百人被捕，還品嚐到香港人熟悉的胡椒噴霧，結果，除了不斷增加的人數外，更有大量的捐款、器材甚至多得要丟棄的pizza紛至沓來。他們一同控訴金融資本家貪婪，引發金融海嘯後卻要政府用納稅人的錢救濟，並高呼「資本主義失效」（Capitalism not worked）。香港人，係時候醒喇。
註釋：
一. 香港交易所「場內及場外交易統計」，http://www.hkex.com.hk/chi/stat/epstat/floorstat/2011floorstat_c.htm
二. 「現貨市場交易研究調查2009/10」香港交易及結算所有限公司
施政報告假大包 見居屋不見公屋
文：楊秀珠
施政報告揭盅，事前處處呼喊的「復建居屋」夢想成真，政府宣佈於2014年預售首批「新居屋」單位2500個，2016年落成。由於供應不多，加上輿論「上車」心切，「新居屋」轉售二手市場的補地價方式又只計買入時的價格——亦即，假如轉售時比買入時地價升了十萬，十萬元差額全屬業主所有——傳媒紛紛將它定性為「賣大包」，抽中「新居屋」彷彿中六合彩。這又惹來部份市民反彈，指責政府不應厚待這些幸運兒。
問題是，「新居屋」能否解決香港人的住屋問題？這個原初的重點似乎在你爭我奪那張還不存在的彩票裡被遺忘了。
「新居屋」不宜居 「可負擔」難負擔
且聽施政報告發表當日特首曾蔭權在電視訪問裡怎麼說：「新居屋與市民負擔能力掛鉤。月入一萬五千元的家庭可購買一百五十萬元的單位。」
何謂「與市民負擔能力掛鉤」？在特首的算式裡，就是那個家庭不吃不喝把收入全花在供樓，連同儲首期也得供一百個月；現實一點，把半數收入供樓，再計上利息，差不多就是二十年。這還要是非常樂觀的預測，我們必須假設在那二十年內自己不會失業，不會減薪，不會花額外支出進修；家人不會生病，不會出意外，不會欠了債要別人幫忙清還；經濟環境不會變動，不會柴米油鹽漲價，更重要的是按揭不會加息。
矛盾的是，輿論在想像供樓能力時假設經濟環境不變，想像賣樓脫手時則假設經濟環境大變，起碼樓市一定大升。惟有帶著如此假設，才會斷言「新居屋」附送可觀地價升值，把「賣大包」一說喊得響徹雲霄。首批「新居屋」2016年落成，五年後方可轉售，換言之它最快也要到2021年才流入市場。十年後市道如有無人夠膽保證，但區區十年已足夠發生諸多動盪。回想1993年，那時候誰會想到短短十年間樓市先在1998年東亞金融風暴重創，再在2003年SARS下挫？有人天真地以為跌市自然不會賣樓，「新居屋」業主不可能有損失，他們大概忘記了董建華年代負資產業主的鬼哭神號。
樓市升也不一定可以細屋搬大屋。居屋升一倍，豪宅也升一倍，結果賣了細屋買不起大屋，更何況吸引海外炒家熱錢的豪宅升幅隨時更高。事實上，歷來居屋業主賣樓再買私樓的比例一直不高，「上車」階梯並不普遍成立。難道賣了樓，賺了錢，我們才發現自己原來要瞓街，才醒悟屋原來是用來住的？
公屋大縮水 政府變馬會
如果屋是用來住的，政府顯然對此不太關心。明明公屋輪候冊累積逾152,000宗申請，政府卻堅拒增建公屋，還厚著面皮在施政報告裡美其名為「保持公屋產量」。產量多少？每年15,000。
只要有小學程度的算術，也計得出輪候人士平均要十年上樓，完全不符政府大言炎炎的「三年上樓」承諾。這時候，政府除了等待輪候人士加薪導致入息超出上限自動喪失資格，就是再厚著面皮耍第二次文字把戲：「三年上樓」，只算家庭申請，不算58歲以下單身人士的申請，而這批單身人士佔輪候個案四成有多！所謂「上樓」也不是上樓，而是首次揀樓機會。嫌地區太遠？嫌外牆滲水？抱歉，再等幾年吧。
不增建公屋，不是因為政府聲稱的「土地不足」。根據房委會的房屋統計數字，2005至2010年私人樓宇的落成量從17,000個減至13,000個，是下降了23.5%，但同期公屋落成量更從25,000個減至6,000個，急瀉76.0%。土地不是沒有，只是留給了地產商興建私樓供人炒賣投機，我們不曾看過哪幅市區重建土地用來興建公屋。曾蔭權揚言一旦私樓呎價跌至四千立即停建居屋，足見住屋不過皮相，托市才是骨子裡的硬道理。
如此政府，香港住屋問題前景黑暗。「新居屋」純屬轉移視線的幌子。屋是用來往的，政府不是馬會，想投機發達請買六合彩。
我叫阿堅，但我係一個師奶。出世時老竇話屋企窮，最大嘅無論係仔定女都要堅強啲，所以就叫我阿堅。自從個仔開始番小學，即係我三十五歲嗰年，我就開始喺屋企附近做食肆樓面，幫補下個頂心杉的教育經費……
（本故事不純屬虛構，亦非全然事實）
現代妹仔
話說自從上次老細搞到阿華姨怠工抗議，之後仲炒埋老細魷魚之後，業主又加租，政府又實踐最低工資，老細諗縮數之餘，就即情唔再請兩更洗碗。原本仲有一更洗碗工，係個講野都唔敢講多句、剛剛來港的新移民阿春，老細話佢初來報到，咩都唔識，好多野教佢，所以就用左最低工資$28請佢（低過阿華姨一蚊架）。
咁之不過，早市、午市、下午茶、晚市，再加宵夜，都要有人洗碗架嘛。老細條數計唔掂，就叫阿春做多兩個鐘，然後呢，等老闆娘放左工番屋企，就叫屋企個印傭耶莉來舖頭，偷雞叫佢在廚房洗碗。
我記得電視話，叫外傭去舖頭幫手係犯法喎，但係老細話：「以前舖頭找唔到數，拖左個賓妹幾個月糧佢都唔敢告我啦，我炒佢？佢兩個禮拜搵唔到新主人，就要俾幾皮野重新叫個僱傭公司幫佢搵主人，咁搞法佢做幾耐都還唔到中介費啦，邊到有錢寄番屋企！我當時唔炒佢已經好仁慈啦！」
「哇，咁咪好平請個奴隸番黎？！」同事阿芬不嬲都好大膽喎。
「嗱阿芬，你唔好諗住去告發我呀！我俾人告到坐監大家無得撈咋！」
咁耶莉都來左兩個星期，剛剛好就黎復活節，老闆娘帶住個仔落嚟舖頭，話太子爺生日，要同老細出去食飯慶祝。我係呢到做左三年，每逢復活聖誕，老闆娘都春秋二祭咁落嚟舖頭架啦，個個人客和員工都派份教會野，叫我地信耶穌，要愛人咁話喎。我有時諗，不如叫老闆愛下我地，唔好扣我地飯鐘錢啦。其實老闆都好驚老婆嚇親街坊，但又怕老婆，無法啦。
今年老闆娘帶埋阿仔落嚟講耶穌，正值晚飯時間，舖頭人多到水泄不通。剩番最近廁所果個一人位無人坐，老闆娘就安排個仔坐係果到，點知個細路見到個印傭姐姐在廚房，就係咁叫「耶莉！耶莉！你做乜係到洗碗呀？」嚇到老闆娘一下拍落阿仔個頭到，可能一時緊張太大力，拍到個細路喊出來，耶莉就即刻從廚房跑出來呵佢。老闆娘驚人地見到，忙趕番佢入廚房囉。老闆娘好難至搞掂個細路，就開始逐枱傳佢的福音。
那邊廂個細路已經係個一人位到打機。剛剛好有個阿婆從廁所出來，都無人睇到佢點跌，見到果陣已經屁股痴住地下呱呱叫，咁我、阿芬、阿成幾個樓面就即刻衝埋去睇下。我眼尾睄到老闆娘望左一望，可能見我地幾個衝左埋去，所以無諗住去同阿婆表達下「愛」啦。太子爺仲勁，阿婆係佢附近跌到，佢竟然繼續打機！個阿婆起身好似好困難，我地都唔知點好，這時，耶莉衝了出來，用廣東話叫個細路：「快啲起身俾婆婆坐下啦！」個細路就好聽話咁即時企左起身讓位俾阿婆，但係老闆就即時衝過來壓住聲音喝佢：「邊個叫你出黎呀，快啲番入去啦！」
我望住耶莉只得廿幾歲的背影，諗起佢都有阿媽，真係好感慨。如果唔係屋企窮到頂唔順，我真係點都唔會俾個女離鄉別井，去咁樣做人妹仔！
阿根廷，足球好
打工仔，仲更勁！
南美足球出了名有爆發力，夠靈活不死板，似乎社會運動都不遑多讓！
早陣子，香港電台忽然播了一齣阿根庭的紀錄片，講一間車衣廠的女工佔領工廠。這個故事，其實在阿根庭，已經發生了好多年啦。
背景，是好多香港市民都不熟悉，但每日都在其中生活的資本全球化囉。四、五十歲的街坊，好多都有在七十年代香港工業起飛時撈工廠養起全家的經驗。不過大家無留意的是，因為歐美的大老細發現香港和其他地方的勞工法例差，人工又平，所以就將廠房搬過來香港和一些第三世界國家，而當時，失業的就是歐美的工人。
老闆吖嘛，梗係望住人工平又無勞工保障的地方去，唔會理你付出青春幫他打拼的。早在1950年代，只要老闆又再搞資本外移玩集體解僱，阿根廷人就會全廠起來罷工／佔領工廠的例子，多不勝數。
而早兩個月電視播放的版本，是廿一世紀初的布魯門製衣工廠佔廠事件。佔廠在廿一世紀資本外移的阿根廷，好多時是老闆欠薪走佬，拋棄廠房和工人，於是工人自行工債廠還，工人組成合作社，嘗試把工廠運作起來，自己兼任行政部門，接單、營銷、生產，有任何事，集體民主決定。像片中的布魯門工廠，是2001年老闆欠薪走佬後，成班已經係中年師奶的工人，自發的佔廠。
她們的口號是「佔領、抵抗、生產」。2003年4月，幾百個軍警與百幾二百個師奶對峙，全國有好多工會過來聲援，名乎其實地抵抗。這件事，最後由工人證明老闆根本就已拋棄工廠，沒有打算經營，才合法地由工人接管。隨後阿根廷有200幾個佔廠運動發生，唔好睇少我地基層市民的能力，200幾間之中有九成以合作社民主運作至今！正所謂萬丈高樓由地起，做到咁樣真係眾志成城架！
睇完電視小草諗，如果當年廠房老闆拋棄我地，移晒啲廠去大陸時，我地唔係埋怨俾人搶飯碗，而係團結起來學阿根廷工人咁樣，咁樣，會唔會，今時今日，香港最有錢的人會無以家咁有錢，但每個基層市民都平均生活好過依家，至少唔會有人要俾呎租價貴過豪宅的租金，去住劏房、棺材房？雖是奇想，但，當初都無人諗過人可以在天空中飛吧！
克旋風夠哂威 克旋風的確好使
文：小草
今年八月國務院副總理克旋風訪港，好不熱鬧，又黑影又垃圾，港大學生被推入後樓梯禁錮 ，大量動作片，不知何解總令小草想起月黑風高殺蟲夜的古老電視廣告。
黑影與垃圾
咁李生就梗係夠威，四週全是黑衣人，港府又大為緊張，傳媒就指港府不肯安排傳媒採訪是妨礙新聞自由，跑緊馬仔等選特首的唐唐就破口大罵呢啲講法係「垃圾」，仲話全部都有安排探訪添。結果，唐唐俾人踢爆，其實只有半數活動有安排採訪，而另外果一半，只有政府新聞處的消息發佈。官媒代替傳媒，仲俾人揭發話克旋風批評港府的言論無在新聞處公佈，梗係俾傳媒人鬧死兼笑死。
克旋風功成北歸，蘇州遺物留待特區芝蔴官清理。警務處處長曾偉雄頓成眾矢之的，奉召到立法會保安事務委員會接受問話，拉扯數十日依然神色自若定過抬油。事緣有身穿平反六四黑T恤的男子在克旋風附近出現，立刻令在場警員大為緊張，
該男子雖然只係著住件衫行街乜都無做，但已一野被而警員抬起四腳朝天狀如死曱甴，警員被指按住某電視台的鏡頭唔俾影，係「妨礙新聞自由」。咁一哥就話，因為警員見到有黑影，唔知係咩，本能反應擋住，咁點解出掌咁耐都唔收返要黐實鏡頭，好似武林高手比拼內力咁嘅？哦，因為差大哥隻手俾攝影機卡實咗，拎唔返出嚟……忽然間，立法會內，好似電視台果啲遊戲競技節目咁，忽然間所有人忍唔住爆笑！
目標觀眾喺晒度
達官貴人，間唔中提供呢啲笑料，好似民間都幾開心，個個爭住做文章，網上仲有好多人用左好多精力做左好多藝術創作嚟恥笑呢啲官添！
不過，諗深一層，一個坐到咁上下高的官，出來面對傳媒說話，不會是一個純粹私人決定、一時衝動。咁到底做咩呢？
唐唐係生意人，好知道咩叫做「目標客戶」，君不見隨後咩政協常委、咩廠商會主席，仍出來撐唐，話佢係一個「直率的人」、「做實事的人」，如果佢做特首就好啦咁。大家記唔記得廿三條的推銷員葉劉換個髮型再出來參選時，都係話自己說話「太直率，令到大家唔開心好對唔住」？同樣的說辭，只會不斷重覆，人地講俾有力量影響佢前途的人聽，我地做市民要清醒至好。
至於一哥，打份工，更加無所謂。又唔係有幾十萬人上街要佢下台，律政司又唔慌會起訴佢，一無政治壓力二無法律壓力，烏紗帽梗係穩陣。立法會之嘛，俾你笑完無所謂，毛都不會少一條，繼續高薪做一哥。須知道，份糧係包埋佢出來孭鑊俾人鬧架嘛。況且，佢越亂呷，越係無所不用其極包庇下屬警員的犯錯，換來的只有警員「士氣」更好，更容易認同政府，將維護自由和平等的示威者與打劫之人畫上等號！呢樣野，先至係政府想要的。就算秃鷹下台，換個人上台，只有識做戲同唔識做戲的分別啫！
不怕可笑 不怕民怨 至怕你團結
計下數，今次克旋風襲港邊個有著數呢？
唐唐有著數啦，爭取到表現嘛。
一哥有著數啦，一場好快無人再提起的小小苦肉計，成班兄弟就團結一致。
阿爺肯定有著數，因為克旋風批評過煲呔嘛，肯定令到部份香港人仍然諗住：天子還是英明的，只是賊臣亂政啫，有事搵中央啦！
涉事的還有，傳媒呢！計小草話，傳媒都有著數。點解呢？近年社會上，對傳媒在社會運動期間報導對示威者有偏見的批評慢慢加強，對傳媒平日缺乏質素和了解的急速社會新聞有批評，對日漸娛樂化不深入的報導有所批評。依家俾克旋風吹一吹，全世界忽然就要「維護新聞自由」，捧到記者上天。所以，唔著數之餘都係有著數。
最無著數，莫如一般的打工仔基層市民，繼續任人魚肉，只不過有番場笑劇睇下咁囉……有人會話，咁草民人微言輕，差人咁惡，就咪攪攪震，有時間去搵真銀好過，何必自己攞嚟衰？如果大家咁諗，對唔住，你唔搞人人地會過嚟搞你。八月初先至有年近四旬的保安員被逼到警隊基地接受地獄式軍訓，當場猝死。點解普普通通一個保安要「飛虎隊化」？因為公司鍾意軍事管理。有人事管理公司話唔少企業鍾意請前差人做中層主管，管到班屬下聽聽話話服服貼貼，乖乖為公司賣命。
正所謂，唔洗用劍嘅，用克旋風就得啦；殺人不用明刀明槍，噴幾噴透明藥水，大家就自己玩或者被玩得貼貼服服，真係夠晒威，的確好使。
TVB體有乜好睇？
文：八子
唔睇新聞八子都唔知道原來自己咁背，連最近新興咗種叫TVB體嘅東東都唔知。到底乜嘢係TVB體？咪就係我哋日當餸撈飯食嗰啲電視劇裏面最模稜兩可，講完等於無講嘅台詞囉。我哋成日聽到荷媽對住「陳豪」，又或者係肥燕姐開解阿峯峯或者阿明明嘅時候都會講：「發生呢種事，大家都唔想嘅。」「呢啲嘢，無得強求架喎。」「所謂吉人自有天相，做人呢，最緊要嘅就係開心。」「餓唔餓？我煮碗麵過你食……」大陸嘅同胞都相當受落，失戀嘅網民要人用TVB體嚟安慰，連劉翔失金都要用TVB體嚟鼓勵。其實香港人聽呢啲九唔搭八嘅台詞根本上都聽到悶晒，因為我哋嘅高官都係TVB體嘅能手，八子以為，呢啲咁嘅台詞……用嚟呃下細蚊仔惡搞下就得啫，不過原來竟然有人真係覺得佢平實得嚟又能夠療傷架喎！
不過，八子諗諗下，當我哋嘲笑啲咁「娘」嘅對白都仲有人用，然後自覺「我哋只不過攞佢哋嘅台詞嚟玩下姐，邊個會信呢啲嘢呀？」嘅時候，作為自細撈住電視汁大嘅人，其實又都係TVB體嘅擁護者喎！如果唔係，《溏心風暴》同《家好月圓》都唔會咁收得；《畢打自己人》又好，最近嘅《誰家灶頭無煙火》都好，都唔會做到咁多集啦！講到底，人無論幾多歲呢，都想要有個阿媽喺身邊，當你自己心情唔好，「唔小心」喺公司發咗下屬脾氣嘅時候，喺你隔籬同你講：「發生呢種事，大家都唔想嘅。自尊呢啲嘢無得強求架喎，有時嘅嘢都係好醜命生成嘅。做人最緊要開心，過咗去嘅嘢就唔好諗啦。你餓唔餓，我煲返熱碗湯俾你飲？」又或者當你今日喺公司被人「虐待」完之後同你講：「發生呢種事，大家都唔想嘅。際遇呢啲嘢，無得強求架喎。所謂吉人自有天相，做人呢，最緊要開心。你又唔係要同佢做人世嘅。你餓唔餓呀？我叮返熱啲餸俾你食？」
社會上好多人話，咁辛苦做乜呀，做人你呃下我我氹下你咁就一世啦。好似作得出呢啲台詞嘅某個編劇講：「因為只有咁樣先至最順口，就好似一種生活習慣，你已經搵唔到更好的替代詞……」原來TVB體真係同TVB一樣咁霸道，因為原來我哋笑下笑下，都能夠出口就係TVB台詞：「香港有一百萬人的故事，大家都唔想嘅。衣食住行呢啲嘢，無得強求架喎。所謂吉人自有天相，知足常樂。做人呢，最緊要嘅就係開心。你攰唔攰？可以做下量地官先嘅。」某一日，你老公／老婆出去滾完之後同你講：「發生呢種事，大家都唔想嘅。感情呢啲嘢，係無得控制架喎。兩夫妻呢，最緊要係玩完識得返屋企。你攰唔攰呀？沖個涼早啲瞓？」唔知……仲可唔可以咁樣自己呃自己呢？
外傭風波之己所不欲
文：九月子
家住公屋，樓下壁報板，保皇政黨張貼海報，寫住「外傭爭居港權是否關你事？」，下面仲列了好幾條「十幾萬外傭有居港權會對香港有乜影響？」、「若數十萬外傭子女也來港，教育、醫療、福利是否應付得來」……但係好似好多年前政府都話有167萬人會來香港整冧香港，後尾做官的李少光都自己講番冇167萬人這回事啦！
為選票無所不為
九月子估計，如果今次外傭司法覆核的官司，若不是公民黨的黨員李志喜律師接了來做，那這次事件，會不會仍然咁惹火？
九月子都試過陪朋友打工傷官司，無錢都係用法援服務架啦。遇上法律問題申請法律援助，一係就申訴人自選律師；申訴人放棄唔選，就由法援署選，當申請人或法援署選上某某，律師的角色就是從法律觀點上為申訴人申辯。香港法治社會吖嘛，如果一個二個律師因本人的喜好或立場不辯護，對申訴人就好冇保障，所以被法援署選中的律師，就要好特別的理由，先至可以唔打呢個官司。就好似明明你冇偷野而被屈，咁一個二個律師覺得你生下來賊仔相不替你辯護，對你都好冇保障啦！
保皇黨自己都有好多律師啦，這些基本常識有乜可能唔明？仲要發起遊行去公民黨抗議公民黨黨員打官司，講到尾都係為選票，借頭借路炒作新聞打擊政敵啫，醒目的街坊又邊會咁易上當。
白做八個月 畀你都唔制
九月子也有朋友任職外傭中介公司，外傭處境都幾堪坷：來港工作，係要俾一大筆成三萬港元的中介費。一個月搵$3740，即係頭八個月都是白做的呀，陰功！俾你番一個月工冇糧出你都唔制啦。
一份合約完左，或者僱主任何理由唔再請你，兩星期內找不到第二個家庭請你，你就要返回原居地。再想出國做野？承惠三萬元。搞到好多外傭，被打被無故大罵也好，被拖糧扣糧也好，因僱主全家出外旅遊而被禁錮在家也好，都忍氣吞聲，環境迫人嘛……
不過，成日話環境迫人，環境呢家野，我地又有冇份製造出來呢？
看報紙，關於外傭本來就唔多，僅有的內容裡面，不是外傭如何惡待少主就是近日的「會湧港搶福利」謊言。香港地，竟有十幾萬人白打八個月工，新聞啦卦，幾時見過有報紙講？
僱主拖住唔出糧俾外傭，或私自扣薪，肯定唔少。被拖過糧的朋友都知，大把大公司拖人好多個月糧，到上庭至俾，乜代價都唔駛付。大公司都係咁，何況一個個單丁的外傭僱主？
早排老竇工作嗰到執笠唔畀遣散費，去咗三、四次勞資審裁處，幾乎每次經過和解室，總係聽啲外傭喊到好淒涼，這些又幾時有報紙報過呢？
假如一天香港沒有外傭
好多香港家庭冇左外傭，就少左個人出去搵錢(講緊通常都搵成萬幾甚至幾萬蚊)，樓又會供唔掂，仔女啲補習興趣班學費又會搞唔掂，仲有好多人覺得厭惡的家務、日日買餸煮飯洗碗，24小時照顧老爺奶奶小朋友等。
保皇黨成日話「十幾萬外傭湧來港」，咁一個外傭服侍一個家庭，香港就有十幾萬家庭因而多了一個人去返工，當打個八折都有十萬勞工，而且唔係低薪果隻，呢到講緊幾多經濟效益？
話就話有出糧，不過要人地把自己的家人放下不顧，遠走他鄉來到香港做隨傳隨到的妹仔，單單三千幾（仲要有八個月白做）。我地細細個都有讀中史，人人都知咩叫「不平等條約」啦。
