文: 八子

唔知點解香港人似乎對流氓英雄有特殊偏好，無記翻兜之後又翻兜，都可以仲有市場，咁大個人都仲對超人咁有幻想，八子都不得不講一句我哋香港人真係有啲天真有啲儍。八子見《怒火街頭》個名好似好爆咁，仲以為人哋有啲咩新招式，例如食住遊行個勢講下點解香港會怒火街頭咁啦，點知原來講嚟講去都係嗰三幅被。一講到底，無良西裝律師良心發現變成爛達達法律超人嘅故事到底可以係一個點樣嘅夢想呢？

計八子話，其實呢個真係人性嘅弱點嚟嘅，好似每個小朋友都想擁有叮噹嘅百寶袋咁，對於一個覺得自己大字都唔識多隻，放工返到屋企攰到得返半條人命嘅草根階層嚟講，見到一個有知識又會受到良心譴責的律師，你又聽得明佢講乜佢又聽得明你講乜，仲要衣著打扮言行舉止同自己一樣咁頹……咁樣的一個大狀實在有致命嘅吸引力。呢個律師仲要熱心到唔知點整左間「民間法律諮詢中心」出嚟為民請命同抱打不平喎，都唔怪得佢有啲收視嘅。

雖然八子唔想做泡沫爆破者，不過世界上真係無免費嘅午餐囉，社工同律師都要開飯，都係有人請架，有幾可真係好似套戲咁，無啦啦彈個無政黨背景、或者老闆唔係富商嘅「民間法律諮詢中心」出嚟架。我就算當人哋大把錢唔出糧，而家香港地水電煤租都咁貴，要靠募捐維持一間「民間法律資詢中心」睇嚟都真係做戲先得架咋。唔係八子鍾意潑冷水，呢個世上唔可以話無好似戲裏面嘅丁家富咁，知道自己老竇做緊奸商所以大義滅親嘅人，但呢個世界上比老竇更恐怖嘅人叫老闆，喺呢個已經唔再只係窮人同有錢人鬥爭嘅時代，仲可以出現比業主同地產商更得人驚，連法律都為佢撐腰嘅收樓公司，佢哋仲識請社工話就話要了解居民嘅需要、協助居民解決困難喎，呢啲嘢講就易，但係連收納稅人錢，本應為民請命嘅議員同官員都做唔到啦，八子媽都講得無錯:「害人之心不可有，防人之心不可無」囉。

八子唔知有幾多人真係相信法律超人，但呢個世代已經無金牙大狀呢支歌仔唱架啦，尤其係當有人無啦啦唔做諮詢都可以過下一條過下又一條法例嘅時候，就連條例都信唔過啦，何況只係嗰啲依法辦事嘅人呢！法律就係咁造出嚟架啦，就算包青天翻生，覺得你有冤情，最多咪叫你自己去抗議，爭取修例咁囉。童話時代一早過晒架啦，唔通仲有人儍到以為窮人要好似灰姑娘咁，等啲富二代良心發現嚟救佢哋出火坑咩？