TVB體有乜好睇？

文：八子

唔睇新聞八子都唔知道原來自己咁背，連最近新興咗種叫TVB體嘅東東都唔知。到底乜嘢係TVB體？咪就係我哋日當餸撈飯食嗰啲電視劇裏面最模稜兩可，講完等於無講嘅台詞囉。我哋成日聽到荷媽對住「陳豪」，又或者係肥燕姐開解阿峯峯或者阿明明嘅時候都會講：「發生呢種事，大家都唔想嘅。」「呢啲嘢，無得強求架喎。」「所謂吉人自有天相，做人呢，最緊要嘅就係開心。」「餓唔餓？我煮碗麵過你食……」大陸嘅同胞都相當受落，失戀嘅網民要人用TVB體嚟安慰，連劉翔失金都要用TVB體嚟鼓勵。其實香港人聽呢啲九唔搭八嘅台詞根本上都聽到悶晒，因為我哋嘅高官都係TVB體嘅能手，八子以為，呢啲咁嘅台詞……用嚟呃下細蚊仔惡搞下就得啫，不過原來竟然有人真係覺得佢平實得嚟又能夠療傷架喎！

不過，八子諗諗下，當我哋嘲笑啲咁「娘」嘅對白都仲有人用，然後自覺「我哋只不過攞佢哋嘅台詞嚟玩下姐，邊個會信呢啲嘢呀？」嘅時候，作為自細撈住電視汁大嘅人，其實又都係TVB體嘅擁護者喎！如果唔係，《溏心風暴》同《家好月圓》都唔會咁收得；《畢打自己人》又好，最近嘅《誰家灶頭無煙火》都好，都唔會做到咁多集啦！講到底，人無論幾多歲呢，都想要有個阿媽喺身邊，當你自己心情唔好，「唔小心」喺公司發咗下屬脾氣嘅時候，喺你隔籬同你講：「發生呢種事，大家都唔想嘅。自尊呢啲嘢無得強求架喎，有時嘅嘢都係好醜命生成嘅。做人最緊要開心，過咗去嘅嘢就唔好諗啦。你餓唔餓，我煲返熱碗湯俾你飲？」又或者當你今日喺公司被人「虐待」完之後同你講：「發生呢種事，大家都唔想嘅。際遇呢啲嘢，無得強求架喎。所謂吉人自有天相，做人呢，最緊要開心。你又唔係要同佢做人世嘅。你餓唔餓呀？我叮返熱啲餸俾你食？」

社會上好多人話，咁辛苦做乜呀，做人你呃下我我氹下你咁就一世啦。好似作得出呢啲台詞嘅某個編劇講：「因為只有咁樣先至最順口，就好似一種生活習慣，你已經搵唔到更好的替代詞……」原來TVB體真係同TVB一樣咁霸道，因為原來我哋笑下笑下，都能夠出口就係TVB台詞：「香港有一百萬人的故事，大家都唔想嘅。衣食住行呢啲嘢，無得強求架喎。所謂吉人自有天相，知足常樂。做人呢，最緊要嘅就係開心。你攰唔攰？可以做下量地官先嘅。」某一日，你老公／老婆出去滾完之後同你講：「發生呢種事，大家都唔想嘅。感情呢啲嘢，係無得控制架喎。兩夫妻呢，最緊要係玩完識得返屋企。你攰唔攰呀？沖個涼早啲瞓？」唔知……仲可唔可以咁樣自己呃自己呢？