文:八子

都唔知係唔係仲係八十後效應,最近唔少人都將枝槍頭指向啲「唔識」嘅小朋友,不論《招迹》定係《投條》,都啲叔伯嬸嬸教佢地做「人」嘅道理。其實講來講去,咪又係「老細永遠是對的」同埋「百忍成金」囉!呢啲,八子細時都聽唔少啦!不過,再老套嘅,只要揾過張新花紙包一包又可以出街,所以最近無記搵咗一班青春偶像,同埋鎮台之寶--阿姐拍一套《女王辦公室》。

計八子話,好彩外國人唔睇香港嘅電視劇,如果唔係睇完《女》劇真係以為香港無個正常嘅後生仔囡,唔敢黎香港投資都似。唔係每一日返工遲到早退,開會恰眼瞓對長輩又無禮貌空有學歷嘅「有為青年」;就係博上位走後門,不務正業淨係識送禮嘅「投機青年」;又或者無腦但係天真得嚟傻得幾可愛嘅無腦秘書;仲有一個胸無大志,返工淨係識玩電腦嘅電車男……總之「責任心」、「上進心」一切欠奉。

如果唔係得阿姐鎮守大本營,幫工、做開導,一手包辦,真係好似霸王成大哥講咁「太自由嘅話人就會壞嘅」。八子都係一個可憐嘅打工仔,以前都好想個阿姐咁嘅上司,不過人哋都講到明做戲啦!在唔同公司嘅阿姐之中,呢套劇嘅阿姐簡直係天使啦!八子曾經聽過香港財經小說嘅代表綘衣姐話,年輕人最大本錢就係身體,所以年輕人有捱嘅本錢;康泰嘅阿姐又係《招迹》話自己以前紅眼症都要返工……一句到尾都係為份工唔要命姐。嘩!朝九晚十都唔夠,為五斗米居然要人賣命,真係同做奴隷都差唔多。栢之姐話齋,人人都有阿媽生,唔通阿媽真係生我哋出睇人面色?

而家咁捱,莫非真係想好似佢首主題曲咁:「凡事都識得睇吓面色有前途,捱到老細睇起我開始升呢等於我嚟緊 越攀 越高……」唔少人都諗住好似啲叔伯嬸嬸終有一日捱出頭囉,就可以向啲後生仔出返啖氣,順便教佢地「百忍成金」嘅道理。計八子話,現實邊度會有呢支歌仔唱呢?其實,係人都知道除左果幾丁人到中年終於捱出頭的成功人士,呢個世界絕大多數係捱左半世都仲要比老細/政府一鑊翹起嘅可憐人啦!想要忍到好似阿姐咁,想要老細當佢老婆咁承諾照顧佢一世,又可以工照返舞照跳?咪就好似澳門跑狗咁,整隻電兔係前面跑,不太快不太慢,等隻狗咬唔到又唔會因太困難而放棄,咁隻狗,就係跑到氣咳都係得個睇字啦!