文:小草

這陣子有一堆廣深港高鐵的新聞,但小草作為小市民,看了兩大電視台新聞和方向報生果報的報導,看完一頭霧水,不如各位街坊齊來參詳下:
1) 為有經濟能力的人慳22分鐘,香港人就要每人俾一萬大元?
電視台和新聞紙都只是一尾吹政府版本的「48分鐘直達廣州市中心」,呢樣野,小草一夾落新聞提供的地圖,就聽唔明佢地講咩啦:
現時的廣深港廣州站在番禺石壁,但由番禺石壁再去大部份港人目的地(即廣州市中心)要最少30分鐘車程喎;呢頭政府又話由香港去深圳少左52分鐘(由 100分鐘縮至48分鐘)喎……咁加加減減,即是只是慳左最多最多22分鐘。(仲未計,在香港住唔起西九豪宅的市民要花幾多時間由屋企去到西九搭廣深 港!)而這22分鐘,明顯不是人人都有資格「慳」,因為車票閑閑地四百大元一張。為左呢個只屬於有能力坐貴車的人的22分鐘,就要每個香港人俾一萬大元?
一萬大元喎,對全港128萬生活底於貧窮線的人口來講,可能係一家幾口子兩至三個月的生活費!
這只不過是簡單算術,為何新聞媒體只一面倒幫阿爺唱好呢?
2) 「香港將會被大陸邊緣化」還是「廣深港高鐵將會被市民邊緣化」?
眾多講法中以「邊緣化」一說最為奇妙。
有了廣深港高鐵才第一次聽到:原來香港人咁無自信心!?定還是阿爺話你如果唔起廣深港就會被邊緣化,啲高官就照講,傳媒又照講?現在的新聞,好似連「平衡報導」(即係不同意見都充份報導的基本新聞學原則)都無囉。
其實,往來港深廣的陸上交通種類繁多,無一樣要用$400幾那麼多,時間又不是差太遠,講什麼邊緣化呢?就好似以前建機場鐵路,建的時候就說會快捷方便, 不過車費貴到無人有,結果現在咪又人人坐巴士!與其擔心自己被大陸邊緣化,不如擔心一下鐵路起完乘客不夠,洗咁多錢起但係條廣深港鐵路被邊緣化就真。別忘 記了,這個廣深港以後蝕錢的話,政府要用公帑填數。
3) 造價395億暴跳630億,條數點計要監察
造價跳升接近六成,官員輕輕一句「物價上漲」帶過,連清楚數據都無。但看新聞媒體的報導,不單好少質疑,還主動幫政府諗埋解釋方法:「因為各國爭住大興土 木煲大數,所以搶高左原材料價,咁咪貴囉!」之類的講法都幾多新聞講,仲話「業界」(其實即是誰呢?)估計,再拖就會再貴些。
令人感到一頭霧水的情況是現在的媒體報導方式:一條幾百億的數目,忽然出現,政府自己不交代,傳媒好應該去查問,但傳媒幾時做左政府,竟然「自動自覺」為政府解釋?再講,所謂「物價上漲」是否一漲就漲到630億?點樣計法?邊個投標?唔問清楚點得呀。
4) 「長遠有龐大經濟效益」還是「長遠有龐大經濟損失」?
政府每次想搞咩大龍鳳都會咁講啦,有幾多次準確,有留意的都心水清啦。賣公屋資產俾領匯時夠係咁講,以家就俾領匯迫死好多本土經濟小商戶啦,唔少人失業 啦,仲搞到人跳樓添。搞迪士尼果陣夠講到係威係勢, 現在大家都知港府要用我地的錢填緊俾迪士呢啦。再講,建設炒高了地產,長遠受害的都係基層市民,唔好話供樓供唔起,甚至公屋租金以家都跟市場浮動--就算 俾打工仔短期打到呢條鐵路的工,條路起完之後,你就要承受失業兼且地價炒高的後果,就算吹大個就業額都無用啦。
5) 50年勁賺830億?
政府文件係咁講,新聞照係咁講,好似好勁咁。
好啦,咁計下小學算術啦,50年有830億經濟效益,即平均只有16.6億一年;但前一陣子新聞又講深港西部通道,只不過斥資78億,但效益就有20年 1750億,即係平均每年87.5億!但造價只是廣深港的一成多少少!不過是簡單算術題,為何傳媒很少去主動為大眾指出疑點?

或者,發下夢,630億,搞好本土經濟,可以做什麼?
630億:如果不建廣深港鐵路,香港市民可以用630億做什麼呢?
1) 回購領匯
以現價17.24一個基金單位,2,180,865,373個基金單位,就當有一成溢價,100%回購,即係約414億就可完全買回香港的公屋資產。如此,就可以容許小商戶和社區經濟在公屋區發生,也讓公屋居民生活費降低,全港公屋居民和公屋區小商戶得益。
2) 社區共享投資基金
這是一個鼓勵社區經濟、小本創業的基金,每年只用約3千萬,630億可以用2172年。這基金由2003年1月推行至今,資助金額合共 $191,467,391(1.9億),共資助計劃項目197個。這個基金基本上只有3億,用完政府不再撥款就無。
3) 增聘老師,實行小班教學,讓老師可以合理工作,又讓真正的全人、通識教育可以發生:
現時一名文憑老師入職是 $19835,一名學位老師入職是$21830,全港有 903700 名中、小學生(2008年)受惠,長遠對香港的社會有好處。
4) 僱員再培訓
以07-08年度的資料計算,再培訓局有再培訓津貼共$64,231,005;再培訓計劃及課程開支 $258,189,466;合共:$322,420,471   (即是大約3億)。學員人數: 75546人次,630億可以令到受惠人數激增209倍!
5) 建市區公屋
如果建市區公屋,可以免基層小市民受地價高颷之苦,又不用每日用幾小時上下班,可以有時間休息及與家人相處,提高整體市民生活質素。
根據生果報今年二月的報導,房屋署計劃於2010年在東涌臨海地皮,興建四幢分別高47及49層的公屋,是全港最高的公屋邨,單位數目增加1,000個至3,600個,估計可住1.3萬人。建成這樣一個公屋邨,造價都只是20億!
你都發揮一下你的想像力啦!