文:八子

可能因為深明香港係「女人天下」,所以無記周不時都會出一啲「女人劇」,《女人唔易做》之後係《師奶軍團》,今年嘅重頭戲應該都係《女人最痛》啦!話說無記都好醒,揾左幾個娛樂圈嘅女強人嚟砌呢套劇,三個主角一個係老公出去滾又有事業危機嘅老女強人;一個係事業愛情中間舉棋不定嘅剩女;仲有一個由醜但善良到靚但不可一世嘅整容女,好似真係要撈埋造一部職場港女嘅「血汗史」咁。

雖然八子都係女人,不過大嗱嗱睇左十幾集,都真係感覺唔到有幾痛,有時睇到啲女人爭黎爭去搏上位都真係睇到打露。不過佢嘅賣點豈止一個「鬥」字,女大翻身就係另一個重點,仲成功引嚟好多每個月奉獻唔少錢比各大護膚化妝品牌嘅女仕一齊感嘆:「女人唔易做!」不過,八子諗嚟諗去都唔明白點解次次係無記見到嘅「醜女」都要由靚女扮,仲要係醜化到一種唔似人嘅程度,到底佢係要醜化「醜」呢樣嘢呀,定係只不過想醜化下啲女星令到大家享受下嘲笑佢哋個樣嘅快感呢?就係因為佢哋咁醜,所以就比人「偷呃拐騙」,但「翻身」變靚後就踏上左成魔之路--雖然到最後佢哋都會提醒你:比起外在美,其實內在美更可貴,所以我哋要擺脫色相嘅掣肘咁話喎!

不過計八子話,如果真係咁,咁點解要揾靚女扮醜女,仲要劇情安排佢整容「變返」靚女呢?所以蠢如八子都識講係做戲囉,就好似睇完每一節《女人最痛》鬧爆啲無情膚淺以貎取人嘅獨男港女之後,廣告時段就換上一堆名模提醒你要減肥去眼紋美白去斑,然後我哋就一邊XYZ精華液一邊鬧新一屆嘅「豬港姐」有幾醜樣,其實「女人更痛」嘅可能只為左個樣而自己唔接受自己,所以要靠呢啲立心不良嘅「鼓勵」攞返啲慰藉。

至於每日著住名牌爭上位爭老公到要唔要做高齡單親媽媽,八子睇嚟亦都無機會感受呢啲咁奢侈嘅痛,或者都可以自我安慰其實做名媛都無咩幸褔呀因為佢哋都左右做人難又成日要活係困難嘅選擇之中。不過如果要再拍,或者無記可以拍一部《女人更痛》,一個女人靠洗碗撐起半頭家,每個月五千零蚊人工養活兒女交埋屋租,一家人生活係一個小套房裏面,唔好話SKII呀,OLAY都買唔起,每個月掹掹緊夠活仲要諗辦法錢個參加學校活動…如果大家嫌無劇情,可以加埋:有一日佢哋遇到市區重建,第二日屋主就話要趕佢哋走喎…