文: 阿嘉花

雖然「寧教人打仔,莫教人分妻」,但是,有時夫妻感情的事好難講,如果遇到家庭暴力,或者夫妻極不和諧,繼續一起對大家和兒女都無好處,那麼,離婚都係無可奈何的選擇。不過,有好多基層街坊離婚時,就不只承受婚姻破裂的精神痛苦,更要面對住屋、金錢等問題。今期,就講一些小知識俾大家聽,等有需要的街坊,可以多一個參考。

問:我要離婚…但係唔夠錢請律師,有無其他辦法?

答:如果你負擔到大約千四蚊既費用,可以去政府既家事法庭辦理離婚手續。假如有嚴重經濟困難,就可以去法律援助署,但法援署會審查你的經濟情況,再決定收唔收你錢,又或者減免幾多。(不一定全免)

問:咁法律援助署和家事法庭,邊個比較快?

答:家事法庭因為不用通過經濟審查,一般比較快,但家事法庭的離婚申請都有分幾種最快就係共同申請書,亦即係雙方協議好離婚後既生活費、撫養權等安排,共同提出申請。如無意外,可以快到約莫四個月就拿到一張叫做〔絕對離婚令〕的證明書

問:我無錢搬出去,所以一直都住在同一個單位,這樣算是分居嗎?要分居幾耐才可以離婚?

答:如果雙方同意,要分居一年以上;如果單方面提出離婚就要分居兩年以上。唔一定要分開住不同單位才算分居,其實大家協議到都已經算係。

問:我要養一對仔女,需要生活費,但係老公話無錢,而且佢爛賭,就算有都唔想我地,咁我地既生活費點算呢?係咪可以搵律師打官司呢?

答:其實有D問題律師都未必解決到,就算法庭判佢要比生活費,但佢一直拖,咁都好麻煩。咁有一招,就係法庭可以直接出令在你老公份糧到扣俾法庭。咁如果你老公都真係窮,咁都無法喎。

咁仲有一個方法,就係希望大家唔好歧視領綜援的朋友--其實,如果你仔女細,都建議你盡人母職,多在屋企管教,社會真正需要照顧的,咪就係你和你的仔女囉,仔女大左都會貢獻社會,咁你都有一份教育的功勞架嘛!

問:離婚之後,公屋單位歸我定歸佢呢?

答:一般情況下,由有仔女撫養權的一方繼續住下去,單身一方就搬出。搬出既一方如果要申請公屋,記得透過該邨既房署租約事務處提交公屋申請表,以縮短輪候年期。在輪候上樓期間,可以申請中轉屋,但同樣需要經濟審查。

問:我家搞緊離婚,但係離到之前,實在無辦法再一齊住同一個單位,遲早出事,但我又負擔唔到私樓既租金,我可唔可以暫住另一個公屋單位呢?

答:社會福利署有一個「有條件租約計劃」,未完成離婚手續既街坊暫住,直至離婚完成。不過呢個計劃係留比繼續留在單位就會有極大困難或危險既街坊,而且要經過社署的社工評估,一般離婚個案未必申請到。

其實,如果你係遇到家庭暴力,我們建議你可以找一個專關注這類問題的組織,「群福婦女權益會」,會比你自己單打獨鬥好得多。你可以打呢個電話:31450600星期一至四,上午10:00-1:00; 下午2:00-5:00)。

如果真係非常緊急,就梗係打999啦。