馬仔抖暑好煩惱,賭少兩手人都躁?唔緊要,快活谷收爐,特首辦開show,新一屆特首選舉開鑼在即,搏參選的高官名人一早磨拳擦掌隔空拆招,睇佢地跑馬仔,未夠十八歲都可以人人做馬迷,你話頂癮唔頂癮先?

有幾頂癮?頂癮到排位表都未出大家已經想落注。莫講話曾鈺成葉劉淑儀呢啲黑馬冷馬,連公認大熱嗰三隻唐英年、梁振英、范徐麗泰到依家都唔肯定落場定唔落場,尤其是范婦人猶抱琵琶半遮面,之前話幾個月後再公佈參唔參選一啲口風都唔漏,堪稱嬌羞萬狀我見猶憐,唔怪之得據聞民望最高。相比之下另一邊廂的唐中年同振英哥就豪情奔放造勢頻頻,振英哥不在其位可以對施政不善大加撻伐,起勢打扶貧牌收買人心;唐中年身為政務司司長可以隨手調動公帑資源,檯面上喺立法會曝光講政策,檯底下喺政府新聞處招兵買馬培養助選班底。睇見佢地好肉緊咁扮晒唔肉緊,個個傳媒都戥佢地緊張。

馬經寫法 各師各法

傳媒講跑馬仔,梗係唔少得出馬經。馬經點寫,各師各法,正路嘅就回顧馬匹以前跑成點有咩戰績有咩傷患,又或者睇下佢地呢期晨操狀態如何。家下科學昌明,亦都有啲高科技寫法,好似明報五月底就搵咗港大民意研究所做調查,量度下三隻大熱門有幾多民意支持,暫時結果係范婦人節節領先,唐中年脫腳墮後,不過都仲係跑喺急起直追嘅振英哥前面。

之但係高科技民調,查實冇乜意思,個個都知呢場特首跑馬仔由阿爺幕後操盤,擺明造馬,收內幕消息好過睇啲馬仔有咩表現。馬經話邊個有內幕消息呢?自由黨田不俊出嚟爆料指商家佬齊撐唐中年,原本可以不理,因為自由黨又唔代表誠哥四叔又唔代表中南海,田不俊算老幾?不過貌似搭通天地線的港區人大唔康民話明北京鍾意特首候選人同各大財團有路,搞到呢個消息好似可以睇高一線。

睇還睇,唐中年係上海幫,外界成日估佢係江擇民馬房,可惜江擇民呢個練馬師仲在唔在生直到截稿日都係冇人知,咁快落重注隨時沉船快過鐵達尼。中聯辦王光啊就穩陣喇,乜都唔講實淨係拋三個當選條件出嚟:愛國愛港、擁有高管治能力、在香港社會有認受性。邊個跑出?你地自己對號入座啦。

繪影繪聲 獨欠賠率

嗱嗱嗱,有得對號入座唔等於有得對位畫飛,諗清楚,呢場跑馬仔輪唔輪到我地尋常百姓落注先?份份報紙的「馬經」百花齊放乜鬼都有,偏偏就係唔出賠率!實情係就算俾你貼中邊隻馬跑出,都係一毫子都冇得落袋;不過隻馬跑出之後搞乜出嚟我地都要受,之前董建華留低乜嘢蘇州遺物就講都無謂,家陣曾蔭權砂塵白霍小器利毒,由得成街棺材房自己就搞僭建,我地又奈佢咩何?總之,成件事就好似細蚊仔擲公字賴皮咁,「公你輸字我贏」,邊個跑出著數都唔到你分,無謂戥人亢奮。

范婦人嗰啲所謂「高民望」,其實佢做過啲乜?振英哥嗰啲叫「扶貧」?查實佢自己開大大間測量師行幾十年來日日同地產商坐地分贓。唐中年嗰啲政績?咪就係一邊取消遺產稅紅酒稅塞錢入有錢佬袋,一邊企圖開徵銷售稅想我地買柴米油鹽都俾佢掠水。香港人有得買馬就假嘅,焗住頂硬上就真嘅,有時間睇人地高清跑馬仔睇到追劇咁,不如諗下我地年年月月搵食艱難點算好仲實際。