文:八子

講到抽水,八子相信無人勁得過無記,話說佢最近出咗一套「叫好唔叫座」嘅《天與地》,八子無玩開搖滾,唔知咩叫樂與怒精神,對一班咁有錢嘅退休精算師、前會計師、證經紀喪失理想同良心掙扎嘅故事都無乜興致,不過八子就好佩服無記抽水嘅功夫,無論喺《天與地》、《缺宅男女》,定係《換樂無窮》,都揾咗班窮人同社運人士嚟做人肉佈景,你以為無記打算轉型,推動民眾「起來」?其實所謂人肉佈景,就係將你砌嚟砌去,仲要無聲出嗰種呀!

窮人同社運人士近期做咗無記三線劇集嘅兩個大花面,如果你兩者皆是,咁仲衰!因為如果你窮,唔係衰見利忘義,就係衰死蠢;如果你搞社運,唔係搏名搏利就係心口得個勇字死蠢嗰隻八子由細到大都可算係無記嘅捧場客,發現喺無記嘅電視劇裏面,一係個個都唔憂柴唔憂米,咬住鮑魚贈你兩句嗰款;又或者……雖然壞人同蠢人唔一定窮,但窮人在劇中唔知點解通常都係蠢同埋壞咁囉,你以為《天與地》裏面鼓佬同黑仔食咗家明好壞?不過編劇起碼話你聽佢哋有內心扎,唔似得鼓佬「幫」果班工友,除了擺明做反派之外咩都唔係。明明有好為佢哋着想嘅工會職員,唔單止成日幫佢哋出頭,仲為咗佢哋絶食添!但係佢哋泊咗議員呢個大碼頭之後就乜都睇晒議員頭唔再理工會,再唔係就專「搞事」,明明慢駛又自把自為變堵塞,明明自己入非法油所以被人炒又入工會數仲上門搗亂。(但係,工會大佬就有光環係聖人,一落車話咁就咁唔洗討論要人遵從,咁樣就好似理所當然,不被質疑。)

再唔係好似《換樂無窮》裏面淑香有個搞社運嘅大佬,日日話搞社運所以唔肯揾嘢做,係個唔顧家靠個妹同妹夫過日子嘅失業漢,成日心口掛住衝動兩個字,淨係識得掟飯盒仲差啲搞到個妹無咗份工。再衰啲嘅?《缺宅男女》裏面業主吊高嚟賣,示威反收購都不過係為錢。

好老實啦,人的常識都係靠經驗啫,如果你日日都係睇埋呢D野,好難唔當左呢D野係「事實嘅全部」架喎。講到好似逢去示威的窮人,一係唔正經,一係就無義氣無良心,咁現實中果D俾田X地產迫遷的苦街坊,就真係食死貓囉。

呢個世界咩人都有,八子都唔可以話世界上無好似劇中咁嘅窮人,不過當啲醜角都集中晒喺某類人身上,仲日日睇,咁睇睇下可能都唔記得咗自己睇緊電視劇,容不易一睇新聞就入晒戲對號入座,覺得逢搞社運、逢講工人權利嘅都係「搞事精」、「害人精」,咁各位街坊工友遇到老闆無良地產迫遷時,都唔知可以搵咩人幫手,結果只好逆來順受--其實電視劇的「教育」,只不過就係咁樣啫。