八子睇真d

另類童話之《怒裸街頭II

By 八子


橋唔怕舊最緊要受,其實好似無記新劇《怒裸街頭II》呢類爛仔英雄劇翻兜完再翻兜,八子都已經聞到成陣燶味,但係大家仲樂此不疲,到底除咗靚佬鄭嘉穎,呢套咁嘅劇仲有咩賣點呢?

 

人哋話鍾意睇童話故事嘅,唔係幻想自己係「嬌的的」等人救嘅公主,就係雄斗斗走去救人嘅王子,八子覺得《怒裸街頭II》其實都差唔多之嘛。因為而家官字兩個口,無論豬定狼都係虎視眈眈,小市民無力抵抗,政黨又吹水唔抹嘴,我哋無眼睇囉,唯有希望好似公主咁一覺瞓醒啲壞人走晒一天都光晒。劇裏面一對喺深水埗區肩負起為弱勢社群爭取法律公義嘅「神雕俠侶」,除咗智慧、知識,仲有善良嘅心同埋無比嘅勇氣,唔顧自身嘅利益咁去幫貧苦嘅小市民喎,邊個唔鍾意先?最緊要嘅係佢哋乜都唔駛我哋理,仲幫我哋做埋決定、解決晒所有問題,難怪劇裏面啲個案天花龍鳳一啲公信力都無但係收視都無乜水花啦。

 

其實八子都唔可以否認呢個世界上真係會有好心人嘅,雖然見又真係無乜見到幾多個不過話明做戲咁做,認真你就輸了,唔會有人真係天真到以為喺法庭度講下「窮唔係罪」呢啲大道理,加上似是而非嘅理由就真係乜都打得甩掛,如果法律靠講道理就得,香港都應該唔會有政治檢控、政府都唔駛急住立廿三條啦。好似劇裏面古叔做嘢嗰間茶餐廳克扣人工,都要咁啱佢老闆唔單止個人衰格仲要豬咁蠢走去無理解僱,又咁啱呢件事被「神雕俠侶」知道咗,咁啱佢哋去示威仲要嗰位老闆屋企門口屬於公眾地方,咁啱人哋有養狗,仲要係一條識指令嘅狗,古叔咁啱被隻狗咬咗啖然後無咗雙腳,咁啱蘿霸行行企企時出現頭緒知道咗隻狗係聽到主人指令咬人,仲要咁啱佢錄到音又可以隨隨便便帶隻狗上庭作供做示範,機率應該同中六合彩差唔多架咋。

 

到底八子想講乜?咪就係就算你等到世界上真係有好心人好似籮霸咁幫你,都等唔到咁多巧合俾你唔駛做就攞返屬於自己嘅嘢囉!世界上邊有必贏嘅官司架,正所謂無針無綫,神仙都難變,如果人哋係要走法律罅,唔好話籮霸,俾個威霸你都無用啦!

劇入面乜都話揾記者煲大佢,迫啲無良僱主同埋藥商出嚟談判,講到記者好似大晒咁。計八子話,好似劇入面,得十零友就咁舉下牌又無衝突嘅行動,今時今日根本入唔到人哋報紙同電視台嘅眼,啲人成日都話官商勾結官商勾結,其實漏咗傳媒都係同謀,迫到啲受害市民除非夠爆炸,否則新聞唔會報;不過你太有爆炸力,新聞又話你激動唔理性報衰你。結果,最後將自己嘅幸福交哂落人哋嗰啲「專業人士」手上,都係得返個吉架咋。

 

大家睇劇其實唔駛咁認真嘅,將呢套劇當神咁拜、以為無記終於良心發現幫我哋小市民出一口氣,就更不必啦。