八子睇真D

難為正邪定分界?

By 八子

 

香港人都鍾意懶客觀,唔鍾意分黑白是非,最近就特別興嗰啲「每個人心中都有隻鬼」,無得分正邪忠奸嘅故事,大家覺得咁樣先至符合人性喎。無記就好能夠掌握呢種心理,今次仲攞歷史上嘅大奸角慈禧同李連英出嚟洗底添。

 

話明《大太監》,主腳梗係李連英同埋佢嘅主子慈禧啦,八子睇咗咁多集,絕對體會到電視劇嘅威力啦。就算人人都知慈禧為咗一己私欲把持朝政﹐李連英係收黑錢嘅大貪官,睇完《大太監》,都會對呢兩個人加咗唔少分。皆因無記夠醒目,揾黎耀祥同米雪姐姐嚟做呢兩個角色,又特登加咗唔 少有血有淚嘅情節。慈禧雖然心狠手辣,但都係為求自保姐!仲要辛辛苦苦同東太后恭親王佢哋爭,為個囝守住個江山,衰就衰在個囝又唔生性,新抱又搞對抗,身邊又無信得過嘅人,睇到佢喺宮門外流住眼淚行都行唔穩嗰場戲,的確拮中唔少媽媽級觀眾嘅心嘅!

 

至於李連英﹐就直程做咗一個為勢所迫,但忠義兩全嘅大主角。佢為父還債所以淨身入宮,本來不求問達又為咗保命不得不加入鬥爭,最後仲亂打亂撞做咗慈禧太后身邊嘅紅人添。咁李連英係咪好似劇裏面講又孝順又有 義氣,八子就真係唔知啦,不過,因為有個奸到出汁嘅安德海,仲有處心積累要做低慈禧嘅安親王同東太后,啲衰嘢都推晒落啲大奸角度囉,咁慈禧同李連英又顯得可愛得多啦!

 

不過咁,其實八子媽成日都教八子做人要對事唔對人,人唔一定有分忠奸,不過事就有對錯囉!每個仆街都可能有悲慘嘅過去,又或者柔情嘅一面,但唔代表佢所做嘅嘢唔仆街架喎!到底佢哋忠定奸,等落到地府閻羅王會同佢哋計架啦!不過,因為佢哋受罪嘅人就唔知點計囉!你話慈禧慘,啲老百姓被佢搞到民不聊生唔慘咩?李連英收收埋埋嘅咪又係窮苦百姓嘅血汗錢!不過,因為一般百姓通常喺大劇都隱形嘅……但係如果因為睇咗呢啲劇集而慨嘆一句世事無對錯,或者每個仆街嘅當權者背後都有苦衷,就真係「認真就輸鳥」!

 

唔知無記會唔會考慮拍返套《特區大太監》呢?如果係嘅話,以無記呢個功力,俾多兩錢肉緊嘅話都應該可以幫林公公加返唔少分囉。