八子睇真D

老表的童話

By八子

話 說最近無記嘅《老表‧你好嘢》引起掀然大波,開播之後收到成200幾單投訴,不外乎都係話佢哋分別抹黑內地人同香港人,深化中港矛盾咁話。人哋黃編劇就講到明,大家睇完劇得啖笑就得,就當食住花生睇好戲啦。唔知香港人嘅壓力係咪真係咁大,所以要靠將快樂建築喺人哋身上嚟減壓呢?

其 實八子覺得《老表‧你好嘢》未必係特登抹黑嘅,不過係同歷年《家有囍事》式賀歲喜劇一樣,為咗乎合香港人刻薄嘅習性,將人哋嘅特質無限放大攞嚟笑下嘅啫。 編劇都話佢哋只係將一啲事實用喜劇嘅方式做番出嚟,等觀眾開心下。人哋套劇嘅核心係「和諧」喎,所以王祖藍每日咪洗腦咁「和諧和諧,我會學習的……」囉,雖然八子覺得這邊廂又講和諧、那邊廂又將雙方人馬可以被嘲嘅位無限放大嚟造笑料,感覺真係好似有啲…矛盾咁。

不過,「得啖笑」之後就《老表》都有個童話式嘅和諧結局,本 來被討厭嘅內地表弟最後追到有音樂天份嘅香港表姐,將啲港式小食帶返內地,事業愛情兩得意;本來喺破產後「為人民幣服務」,搞吸水自由行嘅表哥改過自新, 喺有錢舅父嘅資金支持下重振事業,接待過內地金牌選手後生意一帆風順;表姐喺內地參加歌唱比賽贏咗,之後喺台上演說一篇中港和諧論,一團和氣,電視劇就 梗係可以完滿落幕啦。不過,都話得係童話式嘅結局,就知道唔係事實嘅全部啦!香港人早喺北上掘金嘅時候就同時將「香港特式」帶咗返大陸,有錢揾嘅當 然都係一團和氣啦,咪話八子話,被港人北上搞到租金上升要捱貴租,或者成個居住環境被破壞嘅同胞,咪又係好似我哋今日主張「蝗蟲論」嗰啲香港 人一樣!其實,你喺邊處人最終原來都唔重要!重要嘅係你係咪有錢有Say啫!

如果老表唔係有錢人,表哥又好表弟又好事業夢破碎,個童話都幾難圓。唔知現實裏面因為屋企窮到噥嚟香港揾食嘅同胞,做到死之餘仲要俾啲街坊街里攞嚟開下玩笑,唔知會唔會夢到自己被河蟹鉗住呢?