香港近數個月都有堵路示威，剛過去的七一遊行又有一次。剛巧，西班牙亦剛剛有場過萬人又堵路又露營的示威。

示威發生在大選前，西班牙大選前係禁止任何遊行，不過佢地竟然可以佔據西班牙馬德里公路網最中心、最繁忙的太陽門廣場整整一個月，竟然有超過七成馬德里市民理解接受，聽落真係有點太神奇。

越趕越多人 　越打越反抗

今年五月十五日，大選前一個星期，西班牙馬德里一場「現在就要真民主」的五萬人遊行，堵塞了該市最重要的購物區格蘭大道靜坐，當然會招惹警察又驅趕又拉人。

數百人被驅趕後，就進駐市中心著名、繁忙的太陽門廣場，為期四個星期的持續露營抗議亦由此展開。

話明大選前不准遊行，堵路之餘還佔據繁忙的市中心廣場，當然再被驅趕啦。

不過，第一天趕走幾百人後，第二天就引來來數千人聚集，高峰期更有一萬二千人。而且不單止馬德里，國內、外多達三十個城市也有類似的露營抗議聲援行動。

投票都係冇用？

你可能問，萬幾人露營，攪乜鬼，饑饉三十咩？

佢地真係饑饉，不過係真係冇野食呀。

話說西班牙好多人冇工做，每十個成年人就有兩個人失業，青年就仲大鑊，十個青年有四個半失業！

我地個個都放錢入銀行，西班牙人就一早就明白像雷曼之類的銀行問題。事關明明係銀行自己運作的風險太高，又借好多錢出去投機，有得賺時就銀行袋晒，到出事又攤大手板要國家同市民埋單。

政府領導失誤，又淨係搵工人開刀，以往西班牙的企業如有錢賺還遣散工人，會有懲罰性徵稅，現在政府提議取消這些保障工人的措施，即係幫僱主更容易炒工人魷魚。

基層市民挨窮，大選將至，ｄ政黨提出「挽救」經濟的方案，竟然係縮減社會福利之類。

難怪，馬德里市民會話，投票都冇用啦！真正的民主，是投票不可能投得來的。

其實，香港都差不多啫，香港市民啲退休金都係放晒係銀行，明益基金佬就人人都知，若果銀行呀基金呀真係爆煲（好似雷曼咁）真係遇到乜野事，到時臨老就真係得條毛！

人人都可以拎咪講野？

香港亦多左萬人集會，不過市民都係坐係到，聽大粒佬講野同望住螢光幕，最多唱首歌，話就話參與，不過好似多你一個唔多，少你一個唔少咁。

西班牙的萬人集會，只要有野想講，人人都可以輪住拿起咪高峰發言，集會上的事務亦分成不同小組，人人都可加入，平等討論、參與。

諗落除笨有精吖

香港一有堵塞馬路，好多人話搞事、塞住晒之類。

好多外國人，想法卻完全相反。

有朋友在法國遇上突發堵路，就從車上拿塊布舖在路邊，享受一會野餐的悠閒；其他司機見到這條路塞了，就駛走架車兜另一條路，鮮有對示威的人有甚麼怨言。

諗真些，示威的人所爭取的，好似民主啦，或者拒絕再為銀行、地產商的投機埋單咁，都是普羅大眾人人受惠。

當示威的人付出了時間、心力、汗水、口水，甚至被捕的代價，向當權者施加壓力，沒參與示威的人其實都係坐享其成。塞一塞，只是在繁忙生活中多了個喘息空間，或者只是行多一兩條街兜少少路，人地出力爭時，搞掂左你又有得分，諗落都除笨有精吖！

反而如果掛住鬧示威者阻交通，豈不益左果ｄ有權有勢的商家和政府？

西班牙市民就精啦，超過七成的首都市民認同示威者的露宿行動喎！咁咪人人有機會表達自己對社會的想法囉，咁先有社會和諧架嘛！

各位香港市民，都真係要諗諗佢啦！