文：焦

應該是從98年的亞洲金融風暴開始，銀行存款的利息已是雞肋，十幾廿萬定期存款，一個月都得果幾十蚊。上年的金融海嘯之後，各國中央銀行更大幅減息，包括香港在內。直至截稿日，十萬元定存在大笨象銀行一個月，只得象徵式的一蚊利息。不過各位街坊新聞中聽到央行減息，同大家生活的關係，你又知幾多？

何謂加息

其實大家在新聞所聽到的減息，其實是指銀行問聯邦儲備基金借錢的利率（在香港就是金管局），這個利率被視為指標，因為銀行只要肯俾出這個利率，就可以借到好多好多錢。當然，銀行要賺錢，這個標準利率會比存款利率高，比貸款利率低。

無息要人硬食風險

經濟維持低息，對大家而言，最直接的當然就是銀行存款無利息。擺錢落銀行無利息，銀行見你存款少仲隨時要你俾行政費手續費，即係負利息；放錢落餅罐，通漲咁高銀紙就越來越唔見使，作為平民百姓，對住班金融專家真係任人魚肉。

利息低亦迫左好多人為令存款保值而走入金融炒賣的漩渦，特別是電視、報紙、雜誌無限量的財經分析加上滿街投資廣告，令人以為唔去抽幾手新股或供下基金就執輸，但買基金、買股票要承受的風險（風險即是不穩定性，升幅上落越大，風險越大），要比存定期高出很多。

低息，即係迫你硬食風險。其實好多人都唔想承受風險，否則雷曼苦主都唔會因為聽到銀行職員話「雷曼迷債同定期差唔多」所以買迷債，如果定期息水高，有得揀點會無端端轉買迷債。

低息現在不代表永遠

減息後，除左存款利息低之外，借貸利息都會低。不過，你唔好以為借錢易左、利息低左就一定係好事，故事有排都未講完。以按揭為例，雖然按揭利率低，供樓開支會較少，但，唔好忘記，利率是浮動的，今日利率越低，他日利率上升的機會越大，可能一兩年後，供樓開支就會隨利率上升而不斷增加。而且利率低唔代表樓價都會低，大家見樓抵供，你又買我又買，好快樓價會升到一個不合理價位，亦即是所謂的資產泡沫。例如美國金融海嘯其中一個誘因，就係因為息口兩三年就加至5.25厘，好多美國家庭負擔唔起按揭開支，結果被銀行收樓，令銀行出現大量壞帳（所謂的次按危機）。

利息低，不同財務機構都要不斷打電話問街坊借唔借錢，大財團、大機構借錢當然更容易。但不要天真地以為佢地都要捱貴息問財務公司借，金融專才會為他們打算。例如市區重建局就可以發行債券，供大財團內部認購，名正言順與財團、地產商結親。政府亦可以較平的利息融資，進行大型而無必要的基建，將失業問題及債項移交下一手。

所以話，唔好以為加息減息只係關班金融才俊事，其實大家的生活被控制在少數的金融專家之手，不過香港由金融主導，缺乏任何給予市民參與的機會，被控制在所難免。下次有人話香港應該發展金融，記住要問下係發展甚麼金融、為誰人發展金融，費事變成你蝕哂本去發展人地的金融。